Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."
#
Manuskrip téh nyaéta kumpulan naskah pibukueun. Manuskrip fiksimini pikeun ieu...
#
Fiksimini basa Sunda tambah murudul, tambah arédun. Rupa-rupa...
#
Kacaturkeun, basa Ernést Hémingway keur ngariung di hiji kafé, jeung...
#
(Adaptasi wawancara Becky Tuch jeung sababaraha pangarang tur...
#
K. David Harrison teh dosén Linguistik di Swarthmore College sakaligus Diréktur...

INBOKEUNEUN

Kénging Budi Riyanto Karung
Dipidangkeun dina lapak 17 Oktober 2017 09:09:48

Yat! Mugia salira danget ieu aya dina kawilujengan. Ogé aya dina kabagjaan lahir batin. Kamelang téh horéng teu weléh nganteng. Teu kasapih ku wanci. Tan kahalangan ku anggang. Duriat ngudat teu pegat, ti mangsa ka mangsa.
Yat ...

Luak-lieuk bisi aya nu merego. Aman. Sidik ti tadi gé manéhna mah geus ngageubra. Saré tiheula.
Guluprak! Ranjug! Sora nu malédog pager di pipir. Huleng. Peuting jempé-jempling. Kuniang. Koréléng muru lawang dapur. Karérét tina sesela hordéng pangkéng, manéhna anger tibra.
Barasat-barasat sabudeureun buruan tukang-hareup dibatréan. Aman. Beurit badag meureun, lumpat budag-badug.
"Kitu gawé wé nya cunggelik peuting téh!" Pamajikan ngagantawang tukangeun. Tayohna tas maca ketikan inbokeuneun. Ngababukkeun gagang sapu ngajojo punduk. Gep!
"Mah, tenang Mah! Apa téh rék nginbok Yayat, popotongan Mamah, ambéh tingtrim atina."
Manéhna mencrong teleb sajogjongan. Nyekel peupeuteuyanana, meper napsuna. Léos.
Hihi, hadéna percayaeun. Padahal rék nginbok Yati. Maruna.***

RUNTAH (3) \'SAPERSÈN SÈSA HATÈ\'

Kénging Puja Wardana
Dipidangkeun dina lapak 17 Oktober 2017 09:06:04

Jauh tina panyangka, najan hayang dalah kumaha. Takdir teu wasa dipungkir, tèmbong nasib kalindih silib. Pondok jodo saha nu nyaho, panjang baraya ukur ceuk bèja. "Naha, nya?" tumanya sukma. Peurih..., katurih teu euih-euih. Nu bohak beuki logak, hayoh disèpak ku nu calutak. Pajarkeun tèh, "Hapunten, pan Nèng kagungan hak." Duka teuing hak naon, da piraku hak sapatu, nu sidik mah ngadu huntu sangkan batur nyebut, "Jètu!"

Dienyakeun salah, dihenteukeun piraku, basa Manèhna neugtreug tumanya, "Pegat duriat, nya?" Unggal usik disidik-sidik, diulik dibulak-balik, aya kutip mèmèh titik. Panasaran, nganti wanci mèrè bukti, nyaksèni kereteg ati. Cunduk waktu ninggang ka mangsa, dumadak rasa samagaha. Paneuteup poèk, implengan lebeng. Brèh..., nyolok mata buncelik. Nampeu teu euleum-euleum, rèrèndèngan jeung nu lian. Abong ka jalma bèkè, majar hèsè nètè tarajè. Beu, èta awèwè, pira matrè bet tuluy nèkè. Plok, balayah..., geugeuleuh ditamplokkeun satakerna. Hiliwir..., saawak-awak kaangseu runtah. Taya hampura, kari sepersèn sèsa hatè.

ÈDOY

Kénging Abah Asep
Dipidangkeun dina lapak 17 Oktober 2017 08:16:55

Imah Èdoy ka madrasah lumayan jauh. Mapay galeng, ngaliwatan jalan tarabas nu digèdèng balong-balong lega. Balong jenatna Bapa Ulis.

Unggal bada isya manèhna ngaji di madrasah. Ngan hanjakal Si Yayat nu jadi batur ngajina keur gering. Antukna Èdoy indit ngaji sorangan.

Rèngsè ngaji jam salapan. Lembur geus tiiseun. Hadèna galengan sawah jajalaneun mulang, caang kasorot bulan purnama. Rada geueuman sotèh palebah balong Almarhum Ulis.

Èdoy ngarandeg. Palebah balong leumpangna sok ngadadak beurat. Padahal lampu sisi lembur geus kaciri ngajèjèr nyaangan jalan.
Leumpang Èdoy beuki ngagancangan. Da hatèna geus teu puguh rasa. Kasieun beuki nyimbutan. Puringkak, bulu pundukna arajeg. Teu luak-lieuk deui, Edoy lumpat satarikna bari jojorowokan.
"Tulung... Tulung...!" Nepi ka tengah lembur.

Nya puguh kabèh pangeusi imah nu kaliwatan ku Si Èdoy, pada ka laluar.

"Ku naon Èdoy.. ku naon?" Kabèh nyalampeurkeun ngarudag Si Èdoy nepi ka sisi lapang deukeut imahna.

"Keueung Mang, euweuh batur!" ceuk Si Èdoy bari nyengir.

RABIÉS

Kénging Emon Suryadilaga
Dipidangkeun dina lapak 17 Oktober 2017 08:13:50

Urang kota dumadak loba nu owah, saprak loba nu digégél anjing. Rumah Sakit pinuh ku pasén anu kalakuanana matak muringkak bulu punduk. Patingjarerit siga nu nahan kanyeri, sakapeung patingorowok siga aya nu dipikasieun. Ningali kaayaan anu beuki harénghéng, aparat Pulisi katut réngrénganana geuwat ngayakeun rajia anjing. Anjing liar ogé anjing inguan kabéh ditéwakan. Blus, diasupkeun kana sarigsig beusi. Jumlahna aya ratusna. Sanggeus dikumpulkeun, anjing dipariksaan hiji-hiji. Anu positip katerap panyakit rabiés langsung diéksékusi harita kénéh. Sésana anu séhat aya lima. Anjing pudel dua, buldog, hérder, jeung anjing hideung. Anjing anu saréhat geuwat disuntikan vaksin anti rabiés hiji-hiji. Giliran anjing hideung, nu rék nyuntik rada rengkag-rengkog. Sabab anjing téh kalah melong bari ngembeng cimata.
"Aéh, naha ieu mah anjing téh asa anéh, bisa ceurik siga manusa?" ceuk nu rék nyuntik, bari melongkeun anjing.
"Sangkuriang, ieu téh bapa hidep. Piraku hidep téga ka bapa," ceuk anjing.

KAJADIAN

Kénging Asep Rahayu
Dipidangkeun dina lapak 17 Oktober 2017 06:59:52

Toko Barang Tilas geus ditutup, saprak nu boga tokona kapanggih geus jadi bangké di jero lomari jati.
Kacindekan panalungtikan, nu boga toko ngahaja nyumput di dinya nepi ka tiwasna. Teu kapanggih saeutik ogé tapak céda atawa panyiksa dina sakujur awakna. Nu jadi pertanyaan, nyumput tina naon nepi ka jadi bangké kitu? Anéh teu kaharti ku akal.
Lomari Jati disita jadi barang bukti dibawa ku petugas ka kantorna. Disimpen jadi bahan panalungtikan.
Sanggeus sababaraha bulan, lomari jati kapopohokeun, teu kapiroséa, kaluli-luli di gudang. Salah saurang patugas kapincut ku lomari jati, teu diengkékeun tuluy wé dibawa ka imahna.
Peutingna lomari jati geus aya di kamarna. Bari bungah, pamajikan petugas mérésan lomari tuluy ngasup-ngasupkeun papakéanana. Tapi barang rék nutupkeun panto lomari, manéhna ngajerit, reuwas ngadéngé anu cicikikikan di jero lomari.
Puguh wé manéhna tibuburanjat. Brug! Panto lomari ditutupkeun satarikna.
“Pa, aya nu nolol na sesela baju.” Cenah walahwahweuleuhweuh.
Gubrag, kapiuhan hareupeun salakina.

CARITA PEUTING TADI

Kénging Yana Sopyana
Dipidangkeun dina lapak 17 Oktober 2017 06:53:03

Kawih "Peuting Jeung Pangharepan" masih kènèh atra ngagalindeng dina lelembutan.
Ngawirahma antarè, dina wiletan simpè.
Aya rasa keueung jeung hariwang, mangsa kapireng sora angin ngahiliwir ngoyagkeun dangdaunan. Ngusikkeun hatè dina reureuhna peuting.
Kalangkang anjeun ngulampreng, nèmbongan.

"Enung moal kaduhung? da geuning asih tèh ukur cai bari, kanyaah jeung katresna ukur sèsa cimata."

Harita basa hujan ngahelaran, teuteup deudeuh anjeun, umajak ngilungan hujan, dipayung duaan.
Dina mangsa hujan geus lekasan, wirahma angger antarè, marengan lèngkah.
Nèang pangjugjugan, panungtungan.

ANJEUN

Kénging Lina Marlina
Dipidangkeun dina lapak 17 Oktober 2017 06:45:53

Gebeg! Ngadéngé manéhna tacan laki- rabi. Awéwé mah dulang tinandé. Kamana baé salila ieu puluhan taun? Taya beja, taya carita, datang ngajak ngambah
rumah tangga.
Apanan salembur ogé apal yén kuring ngadahup jeung anu jadi salaki ayeuna téh sasat dijodokeun. Ceurik mah ceurik dalah dikumahakeun karunya ka Ambu saréng ka Apa anu sakitu hariwangna boga anak sok disebut parawan kolot.

Rét ku juru panon, manéhna melong kosong ka hareup, siga jararauh panineungan."Sanes téga ngantunkeun Akang, tapi abdi teu aya alesan kanggo ngécéskeun, saha pameget anu satia mitrésna abdi harita." Tembal kuring halon.

Sapanjang jalan taya soara, mobil anu ditumpakan nyemprung narikan ngabeulah jalan. Kadituna teuing kumaha, sabab kuring geus aya di hiji rohangan bari diriung-riung ku lobaan. Hawar- hawar kadéngé ti luar rohangan." Deudeuh teuing carogéna mah pupus teu katulungan." Panon bolotot ras inget omongan manéhna tadi, leuwih hadé ngababatang jadi bugang malar ningali salira atos aya anu miboga..."

MOAL PUKAH

Kénging Sukardi M Noor
Dipidangkeun dina lapak 17 Oktober 2017 06:31:36

Tas digandong dina tonggong. eusina léptop jeung buku catetan anu parenting. Hujan ngarincik ngeureuyeuh. Mun seug maksakeun pasti pakéan téh baraseuh. Anu utamana mah sieun léptop kabaseuhan. Kapaksa kuring méngkolkeun motor kahiji toko sisi jalan nu kabeneran tutup jeung palataranna rada lega tur aya iuh-iuhanna. Reg motor eureun di tempat nu merenah, tuluy mesinna dipareuman. Jrut kuring turun tina motor. Rét kalebah kénca aya bangku panjang. Gék diuk dina bangku nu kabeneran aya wanoja anu sarua keur ngiuhan.
Bari ngadagoan hujan raat tamba tiiseun kuring ngawanikeun maneh, ngajak ngobrol ka éta wanoja. “Sareng saha neng ?”, ceuk kuring bari haté ratug. “Nyalira kang”, mayeran bari neuteup malédogkeun imutna. Haté galecok soméah geuning teu judes, keur geulis téh. Mani pogot ngobrol téh ari dibarung ku bari heureuy mah. Ti harita kuring remen ulin ka imahna. Nepika kajodokeunna, dibeungkeut pageuh ku akad tikah jeung manehna. Geus tilu taun ngajihi nepika boga bati hiji, tina tali kaasih nu dituturusan ku tihang kanyaah, anu moal pukah.

SABELAS DUABELAS

Kénging Edeng Rosman
Dipidangkeun dina lapak 17 Oktober 2017 05:27:48

Meuli coét gedé méhméhan teu ka angkat ku saleungeun, geusan mepeg salaki, timburuan duméh salaki nyolowédor jeung sekretarisna, nelepon salaki, diangkat salakina nu haruhah-haréhoh keur hahahihih jeung sekretaris. "Kang, keur naon? mani haruhah-haréhoh.!"
"Keur ngangkat karung." salakina ngékol hariweusweus.
Gurubug sekretaris ngagurubug langsung dibaju, kasinggung asa disebut karung. "Akang harianeun.! teu rido uingah disebut karung.!" ngambek, ngingkig memener buuk.
"Antosan geuliiis..." salaki ngageroan, pohoeun telepon can ditutup.
"Sarkaang .., moenya aya karung geulis, satéh.!" géréwék pamajikanana tibeulah ditu, gejrét coét ninggang indung sukuna.
Hahahihih jeung sekretaris can réngsé, lieuur.., inget ka pamajikan, gagancangan balik kapegat macét hujan ngagebrét, datang ka imah blus ka pangkéng nyampak pamajikan ngabebengkang indung sukuna bareuh, karérét tukang kebon rurusuhan indit.
"Nyai, keur naon mani sumeuhah?!" takon salakina.
"Keur diurut indung suku, katinggang coét." témbal pamajikan.
"Sarnyii.! moenya diurut indung suku kudu bulucun, satéh.!" salakina kerung.
Derrr..! silih gabrug pada-pada ngaréngsékeun nu can anggeus.

LALAKON

Kénging Sri Paudwal
Dipidangkeun dina lapak 17 Oktober 2017 05:22:18

Lain teu hayang ngalawan manéhna nu ngajak paséa. Asa cumah jeung matak wirang salelembur, sab teu puguh nu diparebutkeun.
"Ah, da kitu Si Herni mah! Awéwé teu eucreug, hayangna ngaganggu salaki batur." Pokna bari jeung nyunghit-nyunghit. Asa teu gugur teu angin ujug-ujug geuleuh ka diri kuring, wawuh gé henteu. Teuing pédah ningali kuring nu gawéna di tempat karokéan, tapi da teu ngarugikeun asana mah.
"Uyuhan daék wawuh jeung awéwé kitu patut!" cumiduh ningali kuring leumpang jeung Bu Érté. Kur ngusap dada bari Istigfar, biwir embut ngajak imut najan haté mah nyeri.
"Naon siah, maké seuri ka aing! Ngaléléwé satéh!" nyerenteng bari jeung nyurungkeun, atuh Bu Érté ngagorowok ningali kuring tigudubrag téh.
Teu loba ngomong kuring néangan batu, rét kana batu nu sagedé peureup kolot, manéhna mundur jiga nu rék lumpat, teu antaparah laju batu digayem nepi kabubuk. Manéhna ukur molohok.