Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."
#
Manuskrip téh nyaéta kumpulan naskah pibukueun. Manuskrip fiksimini pikeun ieu...
#
Fiksimini basa Sunda tambah murudul, tambah arédun. Rupa-rupa...
#
Kacaturkeun, basa Ernést Hémingway keur ngariung di hiji kafé, jeung...
#
(Adaptasi wawancara Becky Tuch jeung sababaraha pangarang tur...
#
K. David Harrison teh dosén Linguistik di Swarthmore College sakaligus Diréktur...

RAJAH

Kénging Ari Andriansyah
Dipidangkeun dina lapak 22 Méi 2017 12:14:13

“Pun sapun, ka luhur ka Sang Rumuhun...” laung sora Ki Sastra di saung panyepén tengahing makam. Mitembeyan deui mantun dina peuting kasalapan. Ngahégak. Dipirig jentréng kacapi tina rawélan ramo-ramo ngalakay. Rangkebong awakna ukur kacaangan damar kakalicesan. Ngarahuh. Di luar, hujan gumuruh silantangan. Parat kana karancang bilik jeung palupuh. Sedeng di landeuh, gulidag walungan nilemkeun padumukan.

Nyorangan. Ras ka pamajikanana méméh nilar, “Ngilu baé jeung Si Cikal ka dayeuh! Tong ieuh melang ka kami jeung makam luluhur...” Ras ka Kadés nu sababaraha kali ngingetan, “Ieu artos parurugi, geura angkat ka tempat rélokasi, Ki.” Ras ka tatangga-tatanggana nu geus ti heula ninggalkeun, “Hayu urang indit, Ki! Sakeudeung deui lembur urang bakal kakeueum!” Teu gedag, beuki pengkuh kayakinanana.

Hujan terus gumuruh, umpalan cai ngaléntab palupuh. Tutunggul-tutunggul luluhurna nungtut carem dina dasaring kalbu. Damar paragat, senar kacapi nungtutan pegat, sarta harepan rampung saurat-urat duriat. Rénghap-ranjug. Tapi, sorana beuki ngalanglaung nembus meredong langit, “Hung... Ahung...”

MÉRÉNGKÉL

Kénging Neneng Yatikurniati
Dipidangkeun dina lapak 22 Méi 2017 12:03:51

Boga lanceuk kembar, advokat, ngaranna Téh Cahaya Suminar. Lima taun ka tukang, Téh Cahaya boga klién, ngaranna Pa Omod. Nyaho perkarana téh perkara kriminalisasi, sab aya muatan pulitik.

Sanggeus kaluar ti panjara, Pa Omod pernah ulin ka imah. Maké mobil anyar, platna masih plat bodas. Ti saprak ulin ka imah, manéhna bet jadi mindeng nga-SMS, ampir unggal usik, ukur nanya, “Kumaha damang?”

Hiji poé, manéhna nga-SMS deui, sanajan bosen ngajawab, tapi tetep kudu ngahargaan. Dibales. Teu nyaho keur teu boga pulsa, apal teu aya pulsaan sanggeus aya pengumuman ti provider, cenah, “Nomor yang anda tuju menolak membayar SMS anda.” Euleuh si Omod, medit kabina-bina. Antukna gegelendeng sorangan. Aing mah cadu ngajawab deui SMS-na. Mayar pulsa ngan dua ratus pérak waé, mumul, komo mun dipénta mayar cicilan karéta api.

MUNGGAH PUASA

Kénging Abah Soma
Dipidangkeun dina lapak 22 Méi 2017 12:03:09

"Dé.! Hayu atuh, bisi beurang teuing. Pan rék jarah téa, ka makam ema." Geus kabiasaan mun rék bulan puasa, urang lembur mah, sok jarah ka makam kolot-kolotna. Tilu puasa emana, geus taya dikieuna. Biasana, nu nyadiakeun dahar saur, nyadiakeun buka puasa. Ku indungna barudak, puguh wé, asa barabé. Sagala éndah kusorangan. Mémang.! Mun saliwatan mah teu pira, tapi.! Ari lain, ahlina mah. Ripuh kacida, heueuh.! Ning cék Roma Irama dina lagu kaleungitan. "Lamun engeus teu aya, karak karasa," kadang urang sok ngagampangkeun. Sok ngamomorékeun deungeun, dalah pamajikan ogé, sok disapirakeun. Na.!ari geus euweuh mah. Jadi céngéng, teu walakaya. Bener ning hirup téh, kudu akur jeung sakasur, akur jeung dulur, akur jeung sa lembur. "Bah.! Kunaon ramisak." Cék si bungsu. "Ah teu nanaon. Ieu ka peureungpeunan." Témbal kuring, pura-pura gigisik.

PANÈN CABÈ KAHADÈAN

Kénging Abah Asep
Dipidangkeun dina lapak 22 Méi 2017 11:54:28

Brug, Ki Dadang rubuh kana palupuh, nyangsaya bangun lungsè. Nyeri hatè, mudal ukur lisan.
"Ari Aki ku naon, datang-datang murang maring kitu?" ceuk Èmèh pamajiknana.

"Lieur! Cai asa tuak, bari kèjo asa catang bobo. Teungeunah sumpahna gè!" Ceuk Ki Dadang.
"Naha Ki? Sing malapah gedang nyariosna!" Emèh kerung.

"Manèhna tèh ti kikirik nepi ka jadi anjing, aing tara kungsi malik beungeut. Aing satia ka manéhna tèh! Naha ayeuna aing ditalapung?" Ki Dadang mudalkeun ka keuheul. pèdah dieureunkeun ti pagawèanana.

"Kudu Ngukur ka kujur nimbang ka badan, Aki tèh geus kolot. Ti ngasuh budak dunungan, ayeuna incuna geus jadi bos Aki. Nya sabaraha puluh taun atuh?" ceuk Emèh. Song amblop eusi duit gegepokan. Jeung surat ti dununganana.
Dibaca ku Dadang. "Ki Dadang, mah waktosna leureuh! Hatè Encèp teu wantun miwarangan Aki kedah kaditu-kadieu.
Ieu artos ti Encèp.
Serat bumi ti pun Èyang. Bumina pa payun-payun sareng bumi pun Èyang. Saurna alim tebih ti Aki Dadang! Mangga tampi Ki, hapunten Encèp!" Dadang anu rèmpo ngarayap, ngagabrug Ni Èmèh.

POTONG RANCATAN

Kénging Ahmad Jayus Rusdi
Dipidangkeun dina lapak 22 Méi 2017 11:42:42

Angin peuting malibir gawir, teu bisa nyingkir kaketir. Sinar bulan murub mubyar, teu jadi panyinglar angar. Deudeuh teuing....

Kidung gandrung kembang gadung. Kembang tineung puspa bodas. Kaambung bet sungkan paanggang.

Panutan gugupay \'na kalangkang bulan. Baranang béntang jajap nu miang. Miang ka alam kalanggengan.
Kiwari manéhna ukur ngukur liliwung gandrung. Naon deui nu kudu diungkarakeun? Sanggeus ringkang ninggalkeun tapak. Sanggeus waktu ngarandeg, ngeureunkeun jajantung. \'Na mangsa rénghap salakina nu panungtungan. Peurih karasa, dipaksa dipungkas kadar. Mangsa ajal geus mapag sukma, geuning rancatan geus ti heula sirna dirurub boéh.

Manéhna sumegruk ceurik balilihan dina samarna peteng katineung.

"Wilujeng angkat Engkang...," sorana dumareda. Leungeun ngusapan buuk budakna nu tibra \'na lahunanana, nu kiwari boga titél budak yatim.**

MALEM MINGGU KULAWU

Kénging Zenal Wahyu
Dipidangkeun dina lapak 22 Méi 2017 10:22:14

Nu geulis ngajeletun. Malem mingguna diiwat hujan. Ngecrek ti asar mula. Dangdanan janten gaplah. Lipen beureum janten geuneuk, marékplékan bales murukusunu. Jejebris, kutuk gendeng maido hujan.

Pasini seja milang béntang di rawayan peuntaseun lembur janten bolay. Mangka tos sayogi kertas bodas sareng patlot duabéna. Badé ngagambar dina wangun silhuét, kumaha kasép ngalémpéréng konéngna gaduh beubeureuh. Senénna badé pamér ka réréncangan sakolana.
Magrib parat, isa liwat. Simpé. Nu kakuping pépérét cihujan nu ngeclakan tina tungtung kenténg kana panyawéran. Sareng siraru nu napuk bohlam 5wat.

"Assalamualaikum...."
Nu geulis curinghak, énggal muka panto tepas.
Bray, lalaki gandang énggal tepang, ngabedega payuneun panto. Panangan kiwana nyepeng hapé, dirémpétkeun sareng konci mobil. Ngabelenyéh, sodakoh ku imut. Nu geulis molohok, kasima. Soca cureuleukna teu ngiceup-ngiceup.

"Punten. Tuang Ibu aya?"
Lenggerek, nu geulis kapiuhan satutas ningal ibuna nonggongan, dikaléng ku nu kasép.

LÉNGKAH

Kénging Sri Paudwal
Dipidangkeun dina lapak 22 Méi 2017 10:19:41

Ngan sakolépat waktu téh, geus rék nyanghareupan puasa deui. Lir layung nu datangna saukur ngahibaran hungkul. Ngabibita ku kelirna nu umyang, lir harepan diri nu teu reureuh nganti-nganti datangna kaajaiban nu bisa ngahudangkeun salaki nu geus sataun campleung koma. Nepikeun haté kapoékan, asa pareumeun obor, léngkah gé titatarajong. Tungtungna nincak jalan salah, talajak ingkar ka Manten-Na. Cul bebeneran nu kapikir bisa nyumponan pangabutuh sapopoé.
"Yah... Geura gugah!" diharéwoskeun kana ceulina. Asa nyelekit kana ati. Taya pakumaha. Salaki teu katingali bakal beunta tina tibrana. Diguyah-guyah satarikna, angger peureum. Teu apal kana kaayaan di imah, teu apal kabutuhan beuki nérékél ngaluhuran embun-embunan. Teu apal ti mana nebus obat keur dirina.
"Yah... Kedah kumaha Mamah, batan sakieu geus kotor awak ngabélaan Ayah?" ngabangingik ceurik nyuuh kana dada salakina sanggeus capé ngagugusur poék nu salila ieu satia marengan.
"Yah... Hapunten Mamah!" nutup katineung nu ancur tingburisat.

BATUR KEUEUNG

Kénging Jun Juanda
Dipidangkeun dina lapak 22 Méi 2017 09:52:45

Tengah peuting. Jut turun kuring tina beus. Deregdeg lumpat muru pangkalan ojég. Suwung. Awak ngahodhod nahan tiris. Torojol, teuing ti béh mana, hiji lalaki maké pakéan hansip nyampeurkeun. “Kang Tarsim, nya?” Kuring nanya. “Leres, Jang,” walonna. “Ieu téh Hendi ti Babakan?” “Muhun, Kang.” “Rék mulang mah, yu, dibaturan. Ojég da moal aya nu kaluar deui.” Kang Tarsim nawaran. Leumpang bareng.

Palebah kuburan, kuring rerempodan. “Sieun jurig, Jang? Tahayul. Dina ayana ogé, jin nu nyiliwuri tamah.” Kang Tarsim surti. “Muhun, nya, Kang.” Kuring némbalan bari haté mah angger empot-empotan. Anjog di jalan cagak. “Jang tepi ka dieu, nya. Akang mah pan ka Pasir Huni.” “Muhun, Kang. Nuhun diréncangan.”

Di buruan kuring cocorowokan ema-emaan. Kadéngé indung ngulutrak muka panto. “Euleuh geuning ilaing. Ludeungan balik peuting-peuting.” “Pedah wé aya batur, Ma.” “Saha?” “Kang Tarsim, hansip ti Pasir Huni.” “Har, pan Tarsim mah maot mangkukna, ragrag tina kalapa.” Ceuk indung kuring bari melong pikasieuneun.

SAHA?

Kénging Ajang Yustiana
Dipidangkeun dina lapak 22 Méi 2017 09:51:59

Asa pernah amprok, ngan poho lebah iraha-irahana mah. Atawa ngan saukur ilusi tina implengan saliwatan? Saha, nya? Baku amprok téh mener lebah gang éta. Gang nu mana? Apan karék nyorang gang ieu. Tapi da lain sakali dua kali ningali gang ieu téh: gang heureut éntép bata beureum kénca-katuhu nu can di pléster, luhurna rajeg ku anténeu nu rapang ku rarancak urut langlayangan. Manéhna ngasongkeun leungeun. "Ka tegalan, yu!" pokna sabari unggeuk. Tegalan mana? Apan di dieu mah ukur rajeg ku wangunan kumbuh sisian dayeuh. Basa kuring nanya ngaran, manéhna ukur ngahayu-hayu bari nungtun. Ka mana? "Pokona hayu!" Bréh. Tegalan. Jelema tinglaliud minuhan tegalan. "Hayu milu!" Pasesedek muru parahu badag di tengah tegalan. Mingkin réa jalma nu sabeungeut, boa sahaté jeung kuring. Dadak sakala langit mongkléng dibarung tatit patingbarasat. Brul deui kuring-kuring ditarungtun ku nu siga kuring. Ngabring. Saha? Rék ka mana?

ANGEN-ANGEN

Kénging Abu Syits
Dipidangkeun dina lapak 22 Méi 2017 09:07:12

Layon geus ditaékkeun kana pasaran. Digotong. Nu nganteurkeun ka astana ngabring. Asép jeung Agus milu pangtukangna.
"Ckckck..., mobilna édun, Gus!" Asép ngusapan mobil weuteuh nu ngajogrog di pakarangan.
"Jigana mobil anakna nu ti dayeuh...." Agus milu kumecrék.
"Mun proyék uing gul, rék meuli mobil kieu, lah! Moal nu hideung kawas ieu, tapi rék nu bodas, tangtu leuwih édun." Asép peureum bari rada nenggak. Ngabayangkeun naék mobil weuteuh.
"Heueuh, ké uing milu, nya? Hayu, ayeuna mah urang ka astana heula, itu batur geus jarauh!" Agus ngagebah.

Asép gawéna leuwih toh-tohan. Beurang-peuting, teu nolih kana kacapé.
"Enyaan, nu hayang mobil weuteuh téh. Tapi sing inget kana kaséhatan, euy! Selow wé, selow...!" Agus ngélingan.
"Moal lila deui gé kabeuli, lah! Pokona uing kudu boga!" Asép nyéréngéh. Agus geus apal pisan kana watek sobatna éta, naon waé nu dicita-citana, kudu laksana.

Sabulan ti harita, Agus ngan bati carinakdak. Nempo Asép ditaékkeun kana pasaran.